Տուբերկուլոզի դեպքերի 79,3 տոկոս լիարժեք ապաքինում

Տուբերկուլոզի դեմ պայքարի համաշխարհային օրվա կապակցությամբ ՀՀ ԱՆ Տուբերկուլոզի դեմ պայքարի ազգային կենտրոնում տեղի ունեցավ մամլո ասուլիս:

17523113_1894341170807003_2494846140171645986_n

Ներկայացնելով նախորդ տարվա ընթացքում իրականացված աշխատանքը` Արմեն Հայրապետյանը նշեց. «Տուբերլուլոզի կառավարման առումով մենք Հայաստանում բավական բարվոք վիճակ ենք արձանագրում և՛ նոր դեպքերի հայտնաբերման, և՛ մահացության ցուցանիշների նվազման միտումների առումով»:

Հատկանշական է, որ 2006 թվականից հետո նկատելի է տուբերկուլոզով հիվանդացության, ինչպես նաև մահացության ցուցանիշների նվազում:  Ինչպես հայտնի է, Առողջապահության համաշխարհային կազմակերպությունը տուբերկուլոզի դեմ պայքարի երաշխավորված վիճակագրություն է համարում  հիվանդության 58 տոկոս հաղթահարումը: Հայաստանը մոտ է այս արդյունքին: Ներկայումս մեր երկրում գրանցվում է տուբերկուլոզի դեպքերի 79,3 տոկոս լիարժեք ապաքինում:

17498539_1894341207473666_3110824729176615041_n

Արմեն Հայրապետյանի ներկայացմամբ 2016 թվականին գրանցվել է 820 նոր դեպք, 2007-ի 1507-ի փոխարեն: 2016-ին  տուբերկուլոզից մահացել է 48  մարդ: Համեմատական կարգով նշենք, որ 2007 թվականին գրանցվել է այս հիվանդությունից մահացության 175 դեպք:

Մասնագետների ներկայացմամբ` շարունակում է մտահոգիչ լինել այն հանգամանքը, որ երբեմն տուբերկուլոզը համակցված է  ՄԻԱՎ վարակով, ինչը բազմապատկում է բուժման դժվարությունները:

17522752_1894341274140326_5463812026231921865_n

Առողջապահության համաշխարհային կազմակերպության հայաստանյան գրասենյակի վարակիչ հիվանդությունների ծրագրերի համակարգող Գայանե Ղուկասյանը հիշեցրեց, որ այս տարի ևս ԱՀԿ-ն առաջորդվում է «Միասին վերացնենք տուբերկուլոզը» կարգախոսով՝ միաժամանակ հատուկ ուշադրություն սևեռելով այս հիվանդությամբ տառապողների նկատմամբ խարանի և խտրականության վերացմանը:

Գայանե Ղուկասյանի ներկայացմամբ` անցած տարի եվրոպական տարածաշրջանում  տուբերկուլոզի 323000 նոր դեպք է գրանցվել, որոնցից 32,000-ը՝ մահվան ելքով: Միևնույն ժամանակ հիվանդության կառավարման և հաղթահարման առումով դրական միտումները ևս նկատելի են:

«Պետք է նկատել, որ դեռևս շարունակում է հիմնախնդիր մնալ ՄԻԱՎ/ ՏԲ համակցված վարակը: Այս մահացու համակցությունը շուրջ 7 անգամ բարդացնում է հիվանդության ընթացքն ու 3 անգամ մեծացնում մահվան վտանգը: Միևնույն ժամանակ շարունակում  է մտահոգիչ մնալ դեղակայուն տուբերկուլոզի գործոնը», — ընդգծեց ԱՀԿ ներկայացուցիչը:

Բժիշկներ առանց սահմանների կազմակերպության հայաստանյան առաքելության ղեկավար Մարի Ժան Պարեն ևս կարևորեց  աս հիվանդության դեմ պայքարի ուղղությամբ իրականացվող աշխատանքների ուղղվածությունը: Նա մատնանշեց այն բոլոր դժվարությունները, որոնց հանդիպում է տուբերկոլոզով հիվանդը, միաժամանակ մատնանշեց դրա դեմ պայքարի ձեռքբերումները: Նա առանձնացրեց հիվանդության հասանելիության հնարավորությունը:

Հիշեցնենք, որ Հայաստանի Հանրապետությունում տուբերկուլոզի հետազոտությունն ու բուժումն անվճար են, հիվանդների բուժումը խրախուսելու նկատառումներով սոցիալական քաղաքականության շրջանակներում հիվանդներին գումար է տրամադրվում, փոխհատուցվում է բուժման ճանապարհածախսը: